Құпиялылық саясаты

Сервис операторы аккаунт деректеріне, сайт пен қосымшаның жұмысына жауап береді.

Дүкен өз сатып алушылары мен қарыздарлары (аты, телефоны, қарыз сомасы, ескертпелер), қызметкерлері мен жеткізушілері туралы өзі енгізген деректерге өзі жауап береді. Бұл деректерге қатысты дүкен — меншік иесі әрі оператор, ал Qolayly оларды дүкеннің тапсырмасы бойынша, тек сервис жұмыс істеуі үшін өңдейді. Дүкеннің мұндай деректерді енгізуге заңды негізі болуға тиіс.

Аккаунт: телефон нөмірі (SMS кодымен кіру) немесе электрондық пошта мен құпиясөз (хеш түрінде сақталады); соңғы кіру күні.

Дүкен: атауы, түрі, ауылы, мекенжайы, телефоны, жұмыс уақыты, картадағы нүктесі, жеткізу шарттары, Kaspi нөмірі мен Kaspi Pay сілтемесі; реквизиттерді тексеру үшін — нысаны (ЖК/ЖШС), атауы, ЖСН/БСН, банкі, IBAN және тіркеу құжатының суреті (сурет тексеруден кейін жойылады).

Дүкен есебі: тауарлар, бағалар, қалдықтар, партиялар мен жарамдылық мерзімдері, қабылдаулар, сатылымдар мен чектер, қайтарулар, есептен шығарулар (суретімен), түгендеулер, ауысымдар мен актілер, жеткізушілер, платформа шоттары. Қызметкерлер — рөлі, құқықтары және қандай құжаттарды жүргізгені.

Қарыз дәптері: қарыздардың аты мен телефоны, қарыз және төлем жазбалары, сатып алушының қарызды растауы (кім, қашан), сомасы мен аударым суреті бар «төледім» өтінімдері.

Сатып алушы: телефон нөмірі, жеткізу мекенжайы мен үйдің картадағы нүктесі, тапсырысқа түсініктеме, тапсырыстар мен шағымдар тарихы (суреттерімен), сіз растаған дүкендердегі қарыздар.

Тапсырысты картамен төлеу (Halyk ePay): сома, шот нөмірі және төлем мәртебесі, банктегі операция нөмірі, карта маскасы (ортаңғы цифрлары жасырылған нөмір), карта түрі (Visa, Mastercard және т. б.), картаны шығарған банк, бас тарту себебі, қайтарулар туралы мәліметтер, сондай-ақ банк хабарламасының салыстыруға қажет қызметтік өрістері (шот нөмірі, сома, валюта, мәртебе, авторизация коды, күні). Банк хабарламасындағы төлеушінің IP-мекенжайын, орнын, атын, телефоны мен поштасын Qolayly сақтамайды. Картаның толық нөмірі, жарамдылық мерзімі және CVC/CVV коды тек банктің төлем бетінде енгізіледі — Qolayly оларды алмайды және сақтамайды.

Пікірлер мен бағалар: дүкен туралы пікірдің жұлдыздары мен мәтіні, курьердің бағасы (жұлдыздар, «уақытында», «сыпайы» сияқты белгілер, түсініктеме), дүкеннің жауабы, пікір туралы шағымдар. Дүкен туралы пікірді барлығы көреді, бірақ авторының аты мен телефоны көрсетілмейді; дүкен пікірдің өзінің қай тапсырысына қатысты екенін көреді. Курьердің бағасын тек курьердің өзі және платформа көреді.

Курьер: аты, телефоны, ауылы, көлігі туралы мәлімет, жеткізулер мен тасымалдар тарихы, кепіл мен кепілгерлер, беру және алу белгілері. Рұқсат алу үшін — ЖСН, жеке куәліктің суреті және онымен түскен селфи; тауарды қабылдағанда — тауардың суреті (Курьерлерге арналған оферта, qolayly.kz/courier-terms); «Жұмыстамын» режимінде — орналасқан жері (3-бөлім).

Тану және өңдеу үшін жіберетін мазмұн: жүкқұжат, тауар және мерзім мөртаңбасының суреттері, дауыстық командалар, есептерге мәтіндік сұрақтар, витринаға арналған тауар суреті. Тануға жіберілген суреттер мен аудио бізде сақталмайды — базаға тек нәтиже түседі (қабылдау жолдары, күн, сұрақ мәтіні). Витринаға арналған тауар суреті өңделген көшірмесімен бірге тауарлардың ашық қоймасында сақталады.

Техникалық деректер: хабарламаларға арналған құрылғы токені, платформа (iOS/Android/веб), қосымша нұсқасы, қателер журналы (қате мәтіні, экран, нұсқа — құжаттарыңыздың мазмұнынсыз), ИИ-есептерге сұрақтар журналы (сұрақ мәтіні, қандай есептеулер орындалғаны, токен саны).

Құрылғыда: қосымша каталог көшірмесін және жіберілмеген құжаттар кезегін (касса интернетсіз жұмыс істеуі үшін), таңдалған тіл мен тақырыпты, есептер чатының тарихын сақтайды. Серверге кететін құжаттардан басқа бұл деректер құрылғыдан шықпайды.

Біз жинамаймыз: банк картасының толық деректерін (нөмірі, жарамдылық мерзімі, CVC/CVV), контактілер тізімін, сатып алушылар мен дүкендердің геолокациясын (курьердің геолокациясы — тек «Жұмыстамын» режимінде, «Сапар» жүргізушісінікі — тек рейсте, жолаушынікі — тек ол жақындарына арналған сілтемеде өзі қосса; 3-бөлім), жарнамалық идентификаторларды. Камера, микрофон және суреттерге рұқсат тек өзіңіз штрихкодты, құжатты, тауарды түсірген немесе дауыспен айтқан сәтте сұралады.

Орналасқан жерді тек курьерлерден және тек курьер қосымшада жеке келісім бергеннен кейін «Жұмыстамын» режимін өзі қосқанда ғана жинаймыз. Келісім журналға жазылады: күні, мәтін нұсқасы, құрылғы. Сатып алушылар мен дүкендердің орналасқан жері бақыланбайды — тек олардың өздері көрсеткен жеткізу нүктесі немесе дүкен нүктесі сақталады.

Не беріледі: координаттар, олардың дәлдігі, қозғалыс жылдамдығы мен бағыты, анықталған уақыты және жалған геолокация белгісі. Қаншалықты жиі: курьер бос кезде — шамамен 30 секундта бір рет, рейс кезінде — шамамен 5 секундта бір рет немесе жолдың әр 15 метрі сайын.

Режим қосулы тұрғанда қосымша орналасқан жерді фонда да, экран бұғатталғанда да жібере алады; бұл кезде iPhone-да геолокация белгісі, Android-та тұрақты хабарлама көрінеді. «Әрқашан» рұқсаты сұралмайды. «Демалыстамын» басылса немесе қосымша жабылса, жіберу тоқтайды.

Не үшін: тапсырысты дүкенге ең жақын курьерге ұсыну; сатып алушыға тапсырысы қайда екенін және курьер шамамен қашан келетінін, ал дүкенге курьер тауарды алуға қашан жететінін көрсету; дау мен талап туындағанда жеткізуді немесе оның бұзылуын растау.

Кім көреді: сатып алушы — тек курьер оның тапсырысын әкеле жатқанда (тапсырғанға дейін); дүкен — тек тағайындалған курьер оның тауарын алуға келе жатқанда (тауар берілгенге дейін); курьердің өзі және оператор. Басқа курьерлер мен бөгде адамдар көрмейді. Хабарламаларда мекенжай мен координаттар жіберілмейді. Қосымша мен сайттағы карта Qolayly серверіндегі картографиялық деректерден құрылады — курьердің орналасқан жері бөгде карта сервистеріне берілмейді.

Қанша сақталады: соңғы нүкте — тек «Жұмыстамын» режимі қосулы тұрғанда. Ол «Демалыстамын» басылғанда немесе келісім қайтарылғанда, сондай-ақ курьерден 30 минут бойы дерек келмесе не режим 14 сағаттан артық қосулы тұрса бірден жойылады — бұл жағдайда курьер «Демалыстамын» режиміне өзі ауысады. Рейс маршруты — жеткізу аяқталғаннан кейін 7 күн; «жеткізілмеді» деп белгіленген рейс бойынша — қаралғаннан кейін 3 жыл (6-бөлім).

Келісімді қосымшада кез келген уақытта қайтарып алуға болады («Келісімді қайтару»): «Жұмыстамын» режимі өшеді, соңғы нүкте жойылады. Ортақ тақтадан тапсырыс алу келісімсіз де мүмкін. Орындалған рейстердің маршруттары жоғарыда көрсетілген мерзімдерде сақталады.

«Сапар» сапарлары (ауылдар мен қалалар арасында). Жүргізуші: «Жолға шықтым» басқаннан кейін (және шығуға 2 сағаттан ерте емес) қосымша көліктің орнын шамамен 10 секундта бір рет немесе әр 30 метр сайын «Жеттік» дегенге дейін жібереді. Оны рейске қатысушылар (жолаушылар, сәлемдеме жіберушілер мен алушылар) және жолаушы сапар сілтемесін жіберген адамдар көреді.

Жақындарға арналған сілтеме: жолаушы сапар сілтемесін өзі қалаған адамға жібереді. Ол арқылы кірмей-ақ көрінеді: қайдан және қайда, көліктің маркасы мен нөмірі, жүргізушінің аты, көлік қазір қайда немесе соңғы рет қайда және қашан болғаны, жақын ауыл және жүріп өткен жол. Жүргізушінің, жолаушының және басқа жолаушылардың телефондары көрсетілмейді. Көлік тек рейс біткенше көрінеді: «Жеттік» (немесе рейс өздігінен жабылғанда) оның соңғы нүктесі мен жолы жойылады. Жолаушы «менің телефонымды да көрсету» дегенді бөлек қосса, оның телефонының орны да (координаттар, дәлдігі, уақыты) беріледі — сапардан кейін де, жолаушы өзі өшіргенше (жақындары оны немесе ұрланған телефонды таба алуы үшін); сапардан кейін — шамамен 2 минутта бір рет немесе әр 150 метр сайын. Телефон сапардан кейін көрініп тұрғанда қосымша бұл туралы 3 күнде бір рет хабарламамен еске салады. Бұл белгісіз сілтеме жеткен соң 2 сағаттан кейін жұмысын тоқтатады; сапар не брондау болдырылмағанда және жолаушы сілтемені өшіргенде — бірден; өшірілгенде телефонының нүктелері бірден жойылады.

Рейс не сілтеме қосулы тұрғанда қосымша орынды фонда да, экран бұғатталғанда да жібере алады; iPhone-да геолокация белгісі, Android-та тұрақты хабарлама көрінеді. «Әрқашан» рұқсаты сұралмайды. Интернет болмаса, нүктелер телефонда жиналып, байланыс пайда болғанда жіберіледі. Қанша сақталады: көліктің соңғы нүктесі мен жолы — «Жеттік» не рейс болдырылмағанға дейін; жолаушы телефонының жолы — соңғы бір тәулік; телефонының соңғы нүктесі — ол көрсетуді өшіргенше.

Сервис жұмыс істеуі үшін: аккаунтқа кіру, дүкен есебін жүргізу, тапсырыстарды қабылдау мен жеткізу, тапсырыстарды онлайн төлеу және ақшаны картаға қайтару, қарыз дәптері, пікірлер мен бағалар, дүкен мен платформа арасындағы есеп айырысу.

Заң талаптарын орындау үшін: дүкеннің шарты бойынша фискалдық чектерді фискалдық деректер операторына беру, есеп құжаттарын сақтау.

Маңыздыны хабарлау үшін: SMS арқылы кіру кодтары, тапсырыстар, ауысымдар, шоттар, қарыздар мен төлем мерзімдері туралы хабарламалар.

Сервисті жөндеу және жақсарту үшін: қателер журналы, иесіздендірілген пайдалану статистикасы.

Біз деректерді сатпаймыз, жарнама үшін бермейміз және үшінші тұлғалардың жарнамасын көрсетпейміз.

Тапсырысқа қатысушылар арасында: дүкен өз тапсырысы бойынша сатып алушының телефонын, мекенжайын және түсініктемесін көреді; курьер — мекенжайды, телефонды және жеткізу құрамын; сатып алушы — дүкеннің атауын, мекенжайын және телефонын. Курьер қабылдаған кездегі тауар суретін осы тапсырыстың дүкені мен сатып алушысы көреді; курьердің ЖСН-і мен құжат суреттерін — тек оператор.

Фискалдық деректер операторына — чек мазмұны, дүкеннің өзі жасасқан шарт бойынша.

Деректер қайда сақталады: 14.10.2026 бастап сервистің деректер базасы, файлдары мен серверлік функциялары Qolayly-дің Қазақстан Республикасындағы өз серверінде жұмыс істейді (Алматы қ.; серверлер Hoster.kz бұлттық провайдерінен жалға алынады). Резервтік көшірмелер шифрланған түрде бөлек серверде, ол да Қазақстанда сақталады. Деректер базасының бағдарламасы — ашық кодты Supabase — біздің серверімізге орнатылған; Supabase компаниясына деректер берілмейді. 14.10.2026 дейін деректер Еуропалық одақтағы (Франкфурт) Supabase бұлтында сақталды; онда тек көшу сәтіндегі көшірме «тек оқу» режимінде қалды — жаңа деректер оған түспейді, көшу тексерілгеннен кейін бұл көшірме өшіріледі.

Біздің тапсырмамызбен деректерді өңдейтін инфрақұрылым жеткізушілеріне: Hoster.kz (Қазақстандағы серверлерді жалға беру), Vercel (qolayly.kz сайтының хостингі), Zoho Mail (support@qolayly.kz мекенжайынан поштаны растау және құпиясөзді қалпына келтіру хаттарын жіберу — алушының электрондық пошта мекенжайы), Expo, Apple және Google (хабарламалар мен қосымша жаңартуларын жеткізу).

Кіру коды бар SMS-ті қазақстандық Mobizon провайдері (mobizon.kz) жібереді: оған телефон нөмірі мен коды бар хабарлама мәтіні беріледі.

Онлайн-төлем: «Қазақстан Халық Банкі» АҚ (Halyk Bank, Halyk ePay сервисі). Төлем нысанын банк көрсетеді, карта деректері банк бетінде енгізіледі және Qolayly-ге берілмейді. Төлем жасау үшін банкке соманы, шот нөмірін, төлем сипаттамасын (дүкен атауы), сатып алушы аккаунтының ішкі идентификаторын және тапсырыстағы телефон нөмірін береміз; банктен тек 2-бөлімде аталған операция туралы мәліметтерді аламыз. Ақша дүкеннің банкпен жасасқан шарты бойынша дүкен шотына түседі; картаға қайтаруды сервистің сұрауы бойынша банк жүргізеді.

Жасанды интеллект сервистеріне — тек тиісті функцияны өзіңіз іске қосқанда (батырмамен, суретпен, дауыспен немесе сұрақпен) және тек оны орындауға қажеттісі ғана. Деректер осы функцияны орындау үшін беріледі және біз оларды басқа мақсатқа пайдаланбаймыз.

Anthropic (Claude модельдері, АҚШ): жүкқұжаттарды, чектер мен тізімдерді тану (сурет немесе мәтін — салыстыру үшін дүкеннің тауарлар тізімімен бірге: атаулары, штрихкодтары, өлшем бірліктері, қаптамалары), жүк суретінен орындарды санау, мөртаңбадан жарамдылық мерзімін оқу; есептерге сұрақтар — сұрақ мәтіні, чаттың соңғы хабарламалары, дүкен атауы және дүкеніңіз бойынша есептеу нәтижелері, оларға сатушылардың аттары, ал сұрақ қарыздар туралы болса — қарыздарлардың аттары, телефондары мен қарыз сомалары кіруі мүмкін; қарыз дәптеріне жазбаларды талдау — мәтін немесе сөздің жазбасы және дүкеннің қарыздарлар тізімі (аттары мен қарыз сомалары), қарыздарға еске салу үшін — оның аты, қарыз сомасы мен мерзімі; жеткізушіге тапсырыс бойынша кеңес — тауар атаулары, қалдықтар, сатылу жылдамдығы, жеткізуші атаулары және сіздің ескертпеңіз; Ұлттық каталог кодтарын таңдау — тауар атаулары және табылған каталог карточкалары; сатып алушының «Көмекші» көмекшісі — өтініш мәтіні немесе оның жазбасы, жіберсеңіз — тауар суреті, әңгіменің соңғы бірнеше хабарламасы, ұсынылған себет, ауылыңыздағы дүкендер тізімі (атаулары, жеткізу, жұмыс уақыты) және табылған тауарлар (атаулары, бағалары, қалдықтары) — телефон, мекенжай және тапсырыстар тарихы берілмейді.

OpenAI (АҚШ): дауыстық жазбаны gpt-4o-transcribe моделімен мәтінге айналдыру — дауыспен қабылдау, есептерге дауыстық сұрақ, қарыз дәптеріне дауыспен жазу және «Көмекші»-ге дауыспен өтініш кезінде; дәлдік үшін жазбамен бірге кеңес мәтіні беріледі — дүкен тауарларының атаулары немесе дәптердегі қарыздарлардың аттары. Жиі сатылатын тауарлардың дайын суреттерін платформа OpenAI моделімен жалпы атаулар тізімі бойынша алдын ала салған — бұл үшін пайдаланушылардың деректері берілмеген.

Photoroom (Франция): «Суретті жақсарту» батырмасын басқанда — фонды алып тастау және жарықты түзеу үшін тауар суреті. Тек тауардың суреті беріледі.

Anthropic пен OpenAI өз API шарттары бойынша API арқылы берілген деректерді модельдерді оқытуға пайдаланбайды. Photoroom тауар суретін өз шарттарына сәйкес өңдейді.

Ұлттық тауарлар каталогына (nct.gov.kz) — НКТ кодтарын таңдау үшін тауарлардың штрихкодтары мен атаулары (іздеу сұраулары). Бұл адамдар туралы емес, тауарлар туралы мәліметтер.

Мемлекеттік органдарға — тек заңды талап бойынша. Курьер тауарды жеткізбесе, ол туралы және рейс туралы мәліметтер (оның ішінде ЖСН, суреттер, маршрут) зардап шеккен дүкеннің арызы бойынша және сұрау бойынша құқық қорғау органдарына беріледі.

Аталған жеткізушілердің бір бөлігі (Anthropic, OpenAI, Photoroom, Vercel, Zoho, Expo, Apple, Google) Қазақстан Республикасынан тыс орналасқан. Сервисті пайдалана отырып, сіз сервистің жұмысына қажетті көлемде деректердің осындай трансшекаралық берілуіне келісесіз.

Аккаунт деректері — аккаунт бар кезде. Дүкеннің есеп құжаттары (чектер, қабылдаулар, шоттар) — бухгалтерлік есеп және салық заңнамасында белгіленген мерзімнен кем емес (5 жыл), соның ішінде аккаунт жойылғаннан кейін де — иесіздендірілген түрде.

Тіркеу құжатының суреті — реквизиттерді тексеру аяқталғанға дейін. Курьер маршрутының нүктелері — жеткізу аяқталғаннан кейін 7 күн; «жеткізілмеді» деп белгіленген рейс бойынша — қаралғаннан кейін 3 жыл (талап пен құқық қорғау органдары үшін дәлел). Курьердің ЖСН-і мен құжат суреттері, қабылдаудағы тауар суреті — курьер аккаунты белсенді тұрғанда және соңғы рейсінен кейін 3 жыл (талаптарды қарау үшін талап қою мерзімі). Қателер журналы — 60 күн. Жарамсыз хабарлама токендері автоматты түрде жойылады.

Пікірлер мен бағалар — пікір қалдырылған күннен бастап 6 ай, одан кейін көрсетілмейді және автоматты түрде жойылады. Картамен төлемдер мен қайтарулар туралы мәліметтер тапсырыспен бірге есеп құжаттары ретінде сақталады.

Деректер қорғалған қосылым (HTTPS) арқылы беріледі. Дүкен деректеріне тек оның иесі мен қызметкерлері — иесі берген құқықтар шегінде қол жеткізе алады; бұл әр сұраныс үшін деректер базасы жағында тексеріледі. Дәлел суреттері (есептен шығару, шағымдар, аударымдар) жабық қоймада жатады және қатысушыларға ғана уақытша сілтемелер арқылы ашылады. Құпиясөздер хеш түрінде сақталады. Күн сайын түнде шифрланған резервтік көшірме Қазақстандағы бөлек серверге жасалады; көшірмеден қалпына келтіру ай сайын тексеріледі.

Банк картасының деректері тек банк бетінде енгізіледі және біздің серверлеріміз арқылы өтпейді. Дүкеннің онлайн-төлем кілттері тек сервистің серверіне қолжетімді.

ИИ-есептерге сұрақтар тек оқу режимінде және тек сіздің дүкеніңіздің деректері бойынша орындалады; ИИ басқа дүкендерге де, есептік жазбаларға да қол жеткізбейді.

Сервис 16 жасқа толмаған тұлғаларға арналмаған. Дүкенді тек 18 жасқа толған әрекетке қабілетті тұлға тіркей алады.

Сіз қандай деректеріңіз өңделетінін білуге, оларды түзетуді, бұғаттауды немесе жоюды талап етуге, келісімді кері қайтарып алуға құқылысыз. Ол үшін операторға жазыңыз (байланыс деректері — құжаттың басында); жауап заңда белгіленген мерзімде беріледі.

Аккаунтты өзіңіз жоя аласыз: қосымшада — Профиль → «Аккаунтты жою»; сайтта — qolayly.kz/account/delete. Жойғанда пошта, телефон, мекенжайлар, картадағы нүктелер, құрылғы токендері мен байланыстар өшіріледі; кіру біржола жабылады. Сіз қатысқан дүкендердің есеп құжаттары (чектер, тапсырыстар) заң талап ететін мерзімге иесіздендірілген түрде сақталады. Егер сіз дүкеннің жалғыз иесі болсаңыз, дүкен витринадан алынып, кабинеті жабылады.

Дүкен өзінің қарыз дәптеріне енгізген сіз туралы деректерді дүкен жояды — оған жүгініңіз; қажет болса, хабарласуға көмектесеміз.

Біз саясатты жаңарта аламыз. Жаңа редакция осы бетте күнімен жарияланады; елеулі өзгерістер туралы күшіне енуінен кемінде 10 күн бұрын қосымшада немесе кабинетте хабарлаймыз.